पुणे ट्रॅफिक अपडेट : पुणेकरांनो घराबाहेर पडणार असाल तर थोडं थांबा!

शुक्रवारी 93 रस्ते बंद – प्रवासाआधी यादी पाहा

पुणे आणि पिंपरी-चिंचवड शहरात सुरू असलेल्या ‘पुणे ग्रँड चॅलेंज टूर’ या आंतरराष्ट्रीय सायकल स्पर्धेचा चौथा टप्पा शुक्रवारी (23 जानेवारी) पार पडणार आहे. या 75 किलोमीटर लांबीच्या टप्प्यासाठी पुणे आणि पिंपरी-चिंचवडमधील एकूण 93 ठिकाणी वाहतूक व्यवस्थेत मोठे बदल करण्यात आले आहेत.

नागरिकांच्या सुरक्षिततेसह स्पर्धेचे सुरळीत आयोजन व्हावे यासाठी सकाळी 9 ते सायंकाळी 6 वाजेपर्यंत स्पर्धा मार्गावर सर्व प्रकारच्या वाहनांना प्रवेशबंदी लागू करण्यात आली आहे.

🚴‍♂️ स्पर्धेचा मार्ग आणि वेळ

स्पर्धेची सुरुवात बाणेर येथील राधा चौक येथून होणार असून हा मार्ग
सूस रस्ता, पाषाण, पुणे विद्यापीठ चौक, सेनापती बापट रस्ता, कर्वे रस्ता, वनाज, नळस्टॉप, टिळक रस्ता, अप्पा बळवंत चौक आणि नेहरू रस्तामार्गे जात बालगंधर्व चौक येथे संपणार आहे.

दुपारी 12 ते सायंकाळी 4 या वेळेत राधा चौक ते पूनम बेकरी, पाषाण सर्कल, लॉ कॉलेज रस्ता आणि सेवन लव्हज चौक यांसारखे महत्त्वाचे रस्ते टप्प्याटप्प्याने बंद ठेवण्यात येणार आहेत.

🚦 वाहतूक पोलिसांच्या महत्त्वाच्या सूचना

पिंपरी-चिंचवड वाहतूक शाखेचे पोलीस उपायुक्त विवेक पाटील यांनी संपूर्ण स्पर्धा मार्ग ‘नो पार्किंग झोन’ म्हणून घोषित केला आहे.
बावधन, सांगवी, वाकड, निगडी, पिंपरी आणि चिखली परिसरात वाहतुकीत बदल करण्यात आले आहेत.

या कालावधीत फक्त आपत्कालीन सेवा आणि स्पर्धेशी संबंधित वाहनांनाच प्रवेश दिला जाणार आहे. नागरिकांनी स्पर्धा मार्ग टाळून पर्यायी रस्त्यांचा वापर करावा, असे आवाहन वाहतूक विभागाने केले आहे.

🛣️ स्पर्धेचा संपूर्ण मार्ग

राधा चौक (बाणेर) → पूनम बेकरी (सूस रस्ता) → पाषाण सर्कल → पुणे विद्यापीठ चौक → राजीव गांधी पूल → सेनापती बापट जंक्शन → बालभारती → पत्रकार भवन → लॉ कॉलेज रस्ता → शेलार मामा चौक → कर्वे पुतळा चौक → वनाज → पौड रस्ता → नळस्टॉप → म्हात्रे पूल → सेनादत्त पोलीस चौकी → टिळक चौक → पुरम चौक → अप्पा बळवंत चौक → राष्ट्रभूषण चौक → सावरकर चौक → महाराष्ट्र मित्र मंडळ → सेवन लव्हज चौक → पॉवर हाऊस चौक → डॉ. बाबासाहेब आंबेडकर चौक → इंदिरा गांधी चौक → अर्जुन रस्ता → घोरपडी जंक्शन → लाल महाल चौक → गरवारे चौक → बालगंधर्व चौक